«Ойуунускай ааҕыылара» 

Бүлүү улууһун Советскай Союз Геройа Н.С.Степанов аатынан оскуола 10-11 кылааһын оҕолорун «Уолан» түмсүүтүн уус-уран ааҕааччыларын бөлөҕө, 8 кылаас үөрэнээччитэ Михайлова Марина уонна Бүлүүтээҕи гимназия 11 кылааһын үөрэнээччитэ Петров Степан – барыта 11 үөрэнээччи уонна «Уолан» бырайыак автора, математика учуутала Сыромятникова Анна Прокопьевна, уус-уран салайааччы, саха тылын, литературатын учуутала Муксунова Мария Касьяновна балаҕан ыйын 13-14 күннэригэр Таатта улууһун Чөркөөх нэһилиэгэр буолбут республикатааҕы II «Ойуунускай ааҕыыларыгар» ситиһиилээхтик кыттан кэллилэр.

СР үөрэҕин министиэристибэтэ, «Таатта улууһа» муниципальнай оройуон, Таатта улууһун үөрэҕин управлениета, П.А.Ойуунускай аатынан Чөркөөх орто оскуолата тэрийиилэринэн ыытыллыбыт икки күннээх ааҕыыларга Томпо, Кэбээйи, Нам, Амма, Чурапчы, Бүлүү, Таатта улуустарыттан элбэх оҕо, учуутал кытынна.

Бөдөҥ общественнай, политическай деятель, учуонай, саха советскай литературатын төрүттээбит улуу суруйааччы Платон Алексеевич Ойуунускай төрөөбүтэ 120 сылыгар ананаммыт тэрээһиҥҥэ оҕолор көхтөөхтүк кыттан, оскуолаларын, улуустарын, чиэһин дьоһуннук көмүскээтилэр. Ол курдук уолаттар П.Ойуунускай «Туруҥ, туруҥ, туойуҥ!» хоһоонун үрдүк таһымнаахтык ааҕан, III степеннээх лауреат үрдүк аатын ыллылар. 8 кылаас үөрэнээччитэ Михайлова Марина "Туйаарыма Куо” күрэххэ кыттан, «Кэрэчээнэ Куо» номинацияҕа тигистэ, оһуокай күрэҕэр дипломант буолла. Бүлүү гимназиятыттан 11 кылаас  үөрэнээччитэ Петров Степан Сыромятникова А.П. салалтатынан «Дьулуруйар Ньургун Боотур» олоҥхоҕо оҥорбут задачаларынан чинчийэр үлэҕэ  уонна бу олоҥхоҕо Петров К.Н салалтатынан «Бухатыырдар охсуһуулара», «Кыайыы өрөгөйө» диэн муостан үлэлэринэн оҥоһук түһүлгэлэригэр 3 миэстэлэри ылаттаата, Бэс Дьарааһын аатынан оскуола анал бирииһигэр тигистэ.

Үөрэнээччилэр Д.К.Сивцев – Суорун Омоллоон тэрийбит Чөркөөхтөөҕү политсыылка музей-комплексыгар, П.А.Ойуунускай аатынан государственность музейыгар, Ойуунускай төрөөбүт алааһыгар музей-уһаайбаҕа сылдьан, элбэҕи көрдүлэр, билиилэрэ-көрүүлэрэ хаҥаата. Музейдары дуоһуйа көрөн, оонньоон-көрүлээн, оһуокайдаан, оҕолордуун билсиһэн, олус астына, үөрэ-көтө сырыттылар.

Былатыан Ойуунускай төрөөбүт алааһыгар Дэлбэрийбиккэ сылдьан, үөрэммит оскуолатын, төрөөбүт балаҕанын, олорбут алааһын көрөн, нууччалыы, сахалыы, английскайдыы кэпсиир Чөркөөх оскуолатын экскурсовод оҕолоруттан элбэх кэрэхсэбиллээҕи иһиттилэр, билбэтэхтэрин биллилэр. Олохтоох телевидениеҕа интервью биэрдилэр, хоһооннорун аахтылар. Казах кыыһа, суруйааччы, ырыаһыт Турсынай Оразбаева аатыгар Суорун Омоллоон бырайыагынан оҥоһуллубут кэрэ көстүүлээх, казахтыы оҥоһуулаах беседкаҕа тохтоон, хоһооннорун өссө төгүл ааҕан иһитиннэрдилэр. Турсынай Оразбаева Тааттаҕа маҥнайгы ааҕыыларга кэлэ сылдьыбытын биллилэр.

Чөркөөх орто оскуолатын саха тылыгар, литературатыгар учуутала Сергей Евгеньевич Бубякин нэһилиэктэрин таһыгар баар кэрэ-бэлиэ миэстэлэри кэрэхсэбиллээхтик кэпсээбитэ, Ойуунускай айымньыларыгар оҥоһуллубут пааматынньыктары көрдөрбүтэ бэйэтэ туспа, умнуллубат, чаҕылхай түгэн буолар. Халамнаайы күөлүн аттыгар суол кытыытыгар турар Ньургун Боотур, куйуурдуу турар оҕо, Тохтобулга Ойуун пааматынньыктарын сөҕө-махтайа көрдүлэр. «Көтөрдөр мөккүөрдэригэр» тохтоон, хаартыскаҕа түстүлэр.

Оҕолор улуу суруйааччылар, уран тыллаахтар, норуот ырыаһыттара, олоҥхоһуттар уутуйан үөскээбит ытык сирдэригэр, саха саарыннарын биһигэр – Таатта улууһугар сылдьыбыттарыттан дуоһуйан, элбэҕи билэн-көрөн, олохторугар умнуллубат кэрэ түгэни бэлэхтээбит Чөркөөх оскуолатыгар махтанан, П.А.Ойуунускай саха норуотун сайдыытыгар, инники дьылҕатыгар оҥорбут үтүөтэ, үлэлээбит үлэтэ, олорбут олоҕо биһиэхэ, үүнэр эдэр ыччакка, суолдьут сулус, тулхадыйбат холобур буолуоҕа диэн бигэ өйдөбүллээх саҥа үөрэх сылын ситиһиилэрдээх саҕалаатылар.  

Муксунова М.К., саха тылын, литературатын учуутала,

Бүлүү к.