Олоҥхо уон сылын бэлэмнээн ыытыыга Саха Өрөспүүбүлүкэтин Национальнай Кэмитиэтэ, Саха Өрөспүүбүлүкэтин «Олоҥхо Ассоциацията» общественнай тэрилтэтэ, Саха Өрөспүүбүлүкэтин Култуураҕа уонна духуобунай сайдыыга министиэристибэтэ, "Бүлүү улууһа (оройуона)” муниципальнай оройуон, Н.Г.Чернышевскай аатынан Бүлүүтээҕи педагогическай колледж, М.К. Аммосов аатынан ХИФУ Олоҥхо билим-чинчийэр института, Өрөспүүбүлүкэтээҕи Олоҥхо тыйаатыра тэрийиилэринэн, 2017 сылга Бүлүү улууһугар ыытыллар Өрөспүүбүлүкэтээҕи Олоҥхо Ыһыаҕар бэлэмнэнии, буолбут тэрээһиннэр уопуттарын үөрэтэр, саҥа суоллары торумнуур, саха омугун эпическэй айымньытын – Олоҥхону чинчийии, үйэтитии, олоҥхолооһун үөрүйэхтэрин сайыннарар туһунан санаа атастаһар, кэнчээри ыччат чөл туруктаах, көмүскэллээх буоларын хааччыйарга төрүт үгэһинэн иитии-үөрэтии тосхолун тутуһар суоллары, ньымалары тобулар сыаллаах икки күннээх кэмпэриэнсийэ ахсынньы 5 күнүгэр Бүлүү куоратыгар үрдүк таһымнаахтык саҕаланна. Кэмпириэнсийэ 14 олугунан үлэлээтэ. Оскуола 13 учуутала уонна 4 үөрэнээччитэ кыттыыны ыллылар.

        Кэмпэриэнсийэ иккис күнүгэр биһиги оскуолабыт уонна "Илгэ" потребительскай уопсастыба киин остолобуойа координатордааннар, саха төрүт аһыгар-үөлүгэр "Тыгын Дархан” ресторанын инженер-технолога, Россия үтүөлээх повара, РФ атыытын-эргиэнин үтүөлээх үлэһитэ Тарбаахап Иннокентий Иннокентьевич маастар-кылааһа, тыа хаһаайыстыбатын наукатын доктора, Саха Өрөспүүбүлүкэтин   тыатын хаһаайыстыбатын туйгуна Степанов Константин Максимович лекцията, саха төрүт аһыгар быыстапка буоллулар, дакылааттар истилиннилэр, повардар разрядтарын үрдэттилэр. Бу тэрээһини оскуола коллектива ыалдьыттары көрсүүттэн саҕалаан, атаарыыга диэри үрдүк таһымҥа тэрийэн ыытта.

                                                      Мария МУКСУНОВА.