2017 сыл Республикабыт үрдүнэн Ыччат сылынан биллэриллибитэ. Бу чэрчитининэн Бүлүү куоратыгар кулун тутар 30 күнүгэр Республиканскай  эдэр учууталлар форумнара буолла. Ол курдук форум үлэтигэр Сунтаар, Ньурба, Үөһээ Бүлүү, Бүлүү улуустарын уонна Дьокуускай куорат эдэр ыччаттара кытыннылар. Тэрээһин үөрүүлээх арыллыытыгар Саха Республикатын Үөрэҕирии уонна наука министерствотын государственнай политикатын уонна кадровай үлэ отделын главнай специалиһа Родионова Августина Михайловна форум кыттыылаахтарын үөрүүлээх күнүнэн эҕэрдэлээтэ, эдэр учууталларга таһаарыылаах үлэни баҕарда, Саха Республикатын Үөрэҕириитин министерствотын уонна Үөрэҕирии профсоюһун Саха сиринээҕи Президиумун  рескомун дьаһалынан салгыы наҕараадалары туттарда:

«Үүнэр көлүөнэни иитиигэ-үөрэтиигэ бэриниилээх үлэтин, үөрэҕэрии систематыгар таһаарыылаах үлэтин иһин»  «Надежда Якутии» бэлиэни Г.С.Донской аатынан Бүлүүтээҕи 2-с нүөмэрдээх орто оскуола информатикаучууталыгар Колтовской Александр Иннокентьевичка. «Үүнэр көлүөнэни иитиигэ-үөрэтиигэ бэриниилээх үлэтин, үөрэҕэрии систематыгар таһаарыылаах үлэтин иһин»  Бочуотунай грамотанан Иванова Федора Руслановна, Бүлүү улууһун Чинэкэ орто оскуолатын информатика  уонна химия  учуутала наҕараадаланна.  «Тус кылаатын иһин уонна үүнэр көлүөнэни иитиигэ-үөрэтиигэ бэриниилээх үлэтин, үөрэҕэрии систематыгар таһаарыылаах үлэтин иһин» махтал суругунан Богданова Елизавета  Викторовна, Бүлүүтээҕи Кыһыл-Сыыр орто оскуолатын физика учуутала наҕараадаланна. 

Бүлүү улууһун дьаһалтатын баһы-лыгын социальнай боппуруоһугар солбуйааччы Венера Федоровна Тихонова улуус дьаһалтатын баһылыгын Сергей Николаевич Винокуров, улуус салалтатын аатыттан Бүлүү сиригэр-уотугарүктэммит-тэринэн кэлбит ыалдьыттары эҕэрдэлээтэ уонна  эдэр педагогтарга ситиһиини, сырдыгы баҕарда. 2014 сыллаахха  М.А. Алексеев аатын үйэтитэр сыаллаах-соруктаах республиканскай хамыыһыйа тэриллибитин туһунан эттэ. Быйылгы 2017 сылга улуус үрдүнэн  кини аатын үйэтитэргэ туһуламмыт тэрээһиннэринэн буолаллар: төрөппүттэр форумнара, научно-практическай конференциялар, Алексеевскай ааҕыылар уонна физиктар, математиктар форумнара уонна Сквер туруоруллуута. Маны таһынан М.А.Алексеев аатын үйэтитэргэ кинигэ тахсыахтааҕа күүтүллэр. АК «Алросаны» кытта биир алмааһы кини аатынан ааттыырга диэн этии киллэриллибитэ. Бу дьыл ыам ыйыгар тахсыахтаах анал Москватааҕы «Практические вечера» сурунаал биир  нүөмэригэр Михаил Алексеевка анаан таһааттарарга үлэ барбытын түмүгүнэн, барыллаан таһаарыытын туппуппут онно этиилэри, көннөрүүлэри киллэрэн ыытыллыахтаах. Төрөөбүт дойдутугар Баппаҕаайы нэһилиэгэр эмиэ үлэ бара турар, ол курдук, олорбут дьиэтэ чөлүгэр түһэрилиннэ, фотоальбом тахсыахтаах уо.д.а.

Маны таһынан, быйылгы Кыайыы күнүгэр аналлаах тэрээһиннэр улууспутугар Алексеев төрөөбүт күнүттэн – ыам ыйын 5 күнүттэн саҕаланыаҕа.  Улуустааҕы үөрэх управлениятын аатыттан научно-методическай киин салайааччыта Наталья Егоровна Григорьева Бүлүүтээҕи үөрэх управлениятын начальнигын Маргарита Куличкина уонна коллектив аатыттан эҕэрдэтинэн саҕалаата. М.А. Алексеев, ССРС народнай  учуутала уонна норуот үөрэҕириитин музейын тэрийээччи Г.С. Донской төрөөбүттэрэ 100 сааһа уонна саха бастакы профессиональнай композитора М.Н.Жирков төрөөбүтэ 125 сыла буолара биһиэхэ барыбытыгар улахан эппиэтинэстээх буоларын эттэ. Быйылгы 2016-2017 үөрэх дьылыгар улуус үрдүнэн эдэр 61 учуутал үлэлии-хамныы сылдьарын иһитиннэрдэ. Түмүккэ бу икки күн иһигэр эдэр учууталлар ылсыбыт проектара, былааннара олоххо киирэллэригэр  баҕарда.

Саха Республикатын эдэр учууталларын ассоциациятын бэрэсссэдээтэлэ Андреев Иван Иванович ассоциация делегациятын аатыттан бүгүҥҥү тэрээһиҥҥэ кэлбит кыттааччыларга махтанна.   2017 сыл үөрэх уонна наука министерствотын  үрдүнэн саха народнай учууталын М.А.Алексеев сылынан биллэриллибитин уонна кини аатын үйэтитэр сыаллаах-соруктаах эдэр учууталлар форумнара төрөөбүт Бүлүүтүн сиригэр буолара тоҕоостоох диэтэ. Маны таһынан, Иван Иванович Ассоциация Республика  эдэр учууталларын түмэр сыаллаах-соруктаах үлэлии-хамныы турарын туһунан кылгастык иһитиннэрдэ.

Маастар-кылаастарга барыах иннинэ форум үөрүүлээх арыллыыта уопсай хаартыскаҕа түһүүнэн түмүктэннэ.